Big Bullets yaboola jombo, ipha KB 2-1
Sadyeka akupitirila kudyeka m’mafupa omwe, inde jombo yomwe yakhala ikumvetsa mutu matimu omwe si achisilikali tsopano akubooka.
Lero timu ya Big Bullets yaboola jombo ya Kamuzu Barracks pa Kamuzu Stadium mumzinda wa Blantyre loweluka ndi zigoli ziwiri kwa chimodzi.
Sankhani Mkandawire ndi Fischer Kondowe ndiwo adaliza asilikaliwa chigawo choyamba, Harvey Mkacha asadapukute msonzi wa jombo pogolitsa chamkwelekete mchigawo chachiwiri.
Masewerowo adakhota atangowonjezera mphindi 4 pamene Benson Hojani adamenya bolero pamene amakatola mpira.
Padali kamuthemuthe wosowa pogwira osewera ndi akuluakulu amatimu kugwirana. Masewero atatha ochemerera Bullets adasonkhana panja ati kukwiya ndi zomwe Hojani adachita.
Jombo ya Mafco FC yakokeredwa kuuna ndi mphembedzu za Blantyre United ku Nchalo komwe masewero athera 1-0, Sparrow Msowoya kuchinya.
Pomwe Silver Strikers yalepherana ndi Moyale Barracks 0-0, Epac yapuntha Mponera 4-2.
Mafco ndiyo idayamba kuboola Kamuzu Barracks sabata yatha isanabooledwe lero ndi Bullets.
